Roluloj:
Reĝo, Reĝino, Belega Princino, Bonaspekta Princo, Gardisto I, Gardisto II, Servistino, Drako
--------------------------------------------------------------------------------
Sceno I
(Reĝo, Reĝino, kaj Bonaspekta Princo sidas en luksa kastela ĉambro.)
Reĝo
Kia bela tago.
Bonaspekta Princo
Sed kie estas la Princino?
Reĝino
Ŝi ludas en la ĝardeno kun la servistino.
Bonaspekta Princo
Ĉu tio estas sekura? Oni diras, ke drakoj loĝas proksime.
Reĝino
Ne zorgu. La servistino estas bona virino, kaj la gardistoj ankaŭ ŝin protektas. (La servistino eniras.)
Servistino
(Histerie, al la Gereĝoj) Ho ve, ho ve, La Princino, drako, ho ve, ve, mia Princino, ve! (ploras)
Gereĝoj
(Ege agitataj kaj konfuzitaj) Kio okazis? (Gardistoj eniras.)
Gardisto I
Ho ve, mi vidis hom-manĝeman drakon, kaj la Princino malaperis! Mi certas, ke la drako forportis la princinon!
Gardisto II
Jes, jes, granda drako!
Reĝino
Kio okazis al mia infano!?
Reĝo
Gardistoj! Iru for! Serĉu la Princinon!
Gardisto I
Mi kompreneble volas serĉi la Princinon, sed ne eblas. (Rompas sian lancon.) Mia lanco ĵus rompiĝis. Hieraŭ.
Reĝo
Kial vi ne diris tion al mi?
Gardisto I
Mi ne havis la tempon. Sed mi baldaŭ riparos ĝin.
Reĝo
Arrrgh! (Al Gardisto II) Kaj vi?
Gardisto II
Mia piedo doloras! Mia kruro doloras!
Servistino
Ve!
Reĝo
(Al la bonaspekta princo) Do, ĉu vi ne estas princo? Vi helpu ŝin!
Bonaspekta Princo
Jes, mi estas bonaspekta princo. Sed se la drako vundus min, mi ne restus bonaspekta.
Reĝino
(Kolere) Se iu ne helpos mian infanon, mi vundos ĉiujn. (La reĝo severe rigardas la gardistojn)
Gardisto I
(Kontemplas sian lancon) Se mia lanco funkcius...
Gardisto II
(Frotas sian kapon, ĝemas) Mia kapo doloras!
Reĝino
Mi foriras. Se iu volas helpi min kaj mian infanon, vi devas foriri kun mi. Nun. (Foriras)
Sceno II
(Drakokavo. Drako kaj Princino sidas ĉe tablo. Sur la tablo estas granda kuko, tepoto, kaj tasoj. La kuko aspektas kvazaŭ ĝi ĵus elvenis la fornon.)
Drako
Dankon pro via helpo je la farado de la kuko.
Princino
Ne dankinde. Mi ŝatas kuiri. Ankaŭ vi certe helpis; vi ĝin bakis.
Drako
Mi manĝus kukon pli ofte, se mi havus iun por helpi min. Mi ne povas fari ĝin sole.
Princino
Kial ne?
Drako
Mi ne havas manojn kun lertaj fingroj. (Subite) Aŭskultu: Ĉu estas iu ekster la kavo?
Princino
Kiu estus tie?
Drako
(Laŭte) Kiu vi estas? Envenu!
Bonaspekta Princo
(Laŭte) Redonu la princinon!
Princino
Kial?
Reĝino
Mia kara! Ĉu vi sanas? Ĉu la drako vundis vin?
Servistino
(Plorante) Ho ve! La princino!
Drako
Kompreneble ne! Kia ideo!
Gardisto I
(Flarante; al Gardisto II) Mi flaras kukon!
Gardisto II
(Flarante) Ankaŭ mi.
Reĝo
Redonu la princinon!
Reĝino
Tuj!
Drako
(Al la princino) Kial ili blekas al ni?
Princino
Mi ne scias. Eble ili malsatas. (Eksteren) Patro, Patrino! Envenu. Manĝu kukon kun ni.
Bonaspekta Princo
Kuko?
Reĝino
Ve, ŝi frenezas! Gardistoj, savu ŝin!
Gardistoj
(Unu la alian, kune) Vi!
Drako
Ĉu vi deziras kukon aŭ ne? Ni havas sufiĉe da kuko por ĉiuj.
Bonaspekta Princo
Kuko?
Gardisto I
Mi sciis, ke mi flaris kukon.
Reĝino
Gardistoj!
Gardisto II
Vi eniru unue.
Gardisto I
Ne, vi.
Reĝo
Mi flaras kukon!
Servistino
Kuko?
Bonaspekta Princo
Kuko?...Mi flaras kukon...kaj teon.
Princino
(Eksteriras kun peco da kuko.) Envenu ĉiuj!
Bonaspekta Princo
Ŝi havas kukon!
Gardisto I
Mi malsatas.
Gardisto II
Ankaŭ mi. Ni manĝu ĝin.
Gardisto I
Vi eniru unue.
Gardisto II
Ne, vi.
Reĝino
Mia infaneto kara, ĉu vi sanas?
Princino
Kompreneble. Envenu antaŭ la kuko malvarmiĝos!
Reĝo
Sed...la drako.
Princino
Jes, li manĝos kun ni.
Bonaspekta Princo
Li manĝos nin!
Princino
Kial li volus manĝi vin? Kuko multe pli bongustas!
Drako
Mi verŝas teon por vi! Envenu!
Reĝino
Ĉu estas vere sekura?
Princino
Kompreneble. La drako estas mia bona amiko.
Drako
Mi volas renkonti vin! Bonvenon!
Ĉiuj
(Rigardante unu la alian) Nu...ni manĝu! (Eniras.)